Tinus Nortje Eiendomme proef April 2017.jpg

×

Waarskuwing

JUser: :_load: Kan nie gebruiker laai met id: 70

‘n Selfverduidelikende mediaverklaring van Agri SA lui o.m. soos volg: “Die Gekose Komitee op Ekonomiese en Besigheidsontwikkeling het op 10 Mei die Onteieningwetsontwerp goedgekeur met slegs semantiese wysigings. Die definisie van ‘onteiening’ wat Agri SA hard probeer het om geskrap of verander te kry, is steeds in die wetsontwerp. Die provinsiale verhore oor die wetsontwerp is op kort kennisgewing gehou en daar was min geleentheid vir openbare deelname en insette. Ten spyte van die feit dat Agri SA se provinsiale verteenwoordigers in al die provinsies beswaar gemaak het teen die definisie van onteiening, is hierdie besware nie ingesluit by die provinsiale verslae oor die verhore nie. Daar is goeie argumente uit te maak dat grond en roerende eiendom sterk verskans is, nie net in die SA Grondwet nie maar oor internasionaal in grondwette wat handveste van fundamentele regte insluit.”

AfriForum Jeug het as deel van sy #AfrikaansSalBly-veldtog en om Afrikaans se 91ste bestaansjaar te vier, tydelike taalmonumente uit Jenga-blokke gebou waarop Afrikaanse woorde gedruk is, terwyl 91 ballonne ook by elke geleentheid losgelaat is. Hierdie simboliese aksies is op die hoofkampusse van die Universiteit van Pretoria (UP), Universiteit Stellenbosch (US), die Universiteit van die Vrystaat (UV) en die Noordwes-Universiteit Potch-kampus (NWU) gehou, hoewel die reaksies op die verskillende kampusse verskil het. By die UV en NWU het dit sonder ontwrigting en in goeie gees plaasgevind, maar op die US-kampus het die EFF konfrontasie veroorsaak, terwyl op die UP-kampus die kampussekuriteit die strukture gekonfiskeer en die studente aangesê het om die perseel te verlaat.

Die EFF, wat met hul uitsprake en optredes as ‘n terroriste-organisasie beskou kan word, het op 30 April 2016 in ‘n volgepakte Soweto Stadion by monde van leier Julius Malema hul verkiesingsmanifes bekendgestel. Hoewel hulle nie te vrees is nie, streef die EFF met hul ondersteuningsbasis in hoofsaaklik ‘n werklose en halfgeskoolde swartmassa, na radikale doelwitte wat die beskaafde orde in SA bedreig.

Daarom moet, ten einde hierdie bedreiging ten beste die hoof te bied, kennis geneem word van die EFF-doelwitte, wat soos volg opgesom is in ‘n berig van Claudi Mailovich wat in Volksblad verskyn het:

  • Waar die EFF regeer, sal daar geen name of simbole wees wat verbonde is aan die apartheidsregering nie. Openbare ruimtes sal “gedekolonialiseer word”.
  • Die EFF wil hê wit mense moet in Suid-Afrika bly, maar grondhervorming sonder vergoeding is een van die sewe pilare waarop die EFF hul beleid skoei en dit is ononderhandelbaar - dit sal gebeur en die grond sal verdeel word.
  • Elke huis moet lopende water, elektrisiteit en ‘n spoeltoilet hê. Dit is basiese noodsaaklikhede. Boonop verbind die EFF hom tot ‘n kraan in elke huis.’
  • Korrupte raadslede en uiteraard korrupte munisipaliteite gaan nie geduld word nie. Raadslede word op meriete aangestel en hulle moet woon in die gebied waar hulle ‘n raadslid is. Hulle moet hul selfoonnommer beskikbaar maak en die raadslid se foon sal “24 uur lank werk”. Benewens dit mag die EFF se raadslede nie dronk op straat wees lie en moet hulle lief wees vir lees, want dit is nie ‘n antwoord om te sê “ek weet nie”.
  • Die EFF-munisipaliteite gaan vars kosmarkte en vrugtestalletjies bou vir plaaslikverboude kos en noodsaaklikhede. 50% van basiese goedere, dienste en produkte wat deur die munisipaliteit gebruik word, moet in die betrokke munisipaliteite vervaardig, verwerk of aanmekaar gesit word.
  •  Daar mag ook niemand wees wat honger ly waar ‘n EFF-raadslid is nie en die raadslede sal ook arm mense met hul begrafnisse help.
  • Die EFF beplan om alle informele nedersettings met menslike nedersettings te vervang. Die huise wat hulle gaan bou, is huise wat in vertrekke verdeel is. Daar gaan ‘n kombuis, ‘n sitkamer en minstens twee slaapkamers wees.
  • In plaas daarvan dat tenders verkry word om dienste soos onder meer die skoonmaak van strate en vullisverwydering aan die munisipaliteit te lewer, sal die EFF mense aanstel om die werk te doen. Hulle sal behoorlike salarisse en ‘n pensioenfonds ontvang.
  • Elke wyk sal ‘n skoon en veilige kleuterskool hê. Die munisipaliteite sal ook ‘n beursfonds begin vir finansieel verdienstelike studente wat in die munisipaliteit bly.

Hoewel die bogenoemde punte slegs enkele van die beloftes is, het die EFF die verbintenis daartoe gemaak dat hulle bykomend finansiering sal insamel en by die private sektor sal aanklop om die manifes uit te voer.

‘n Mediaverklaring van die Christen-Demokratiese Party (CDP) lui gedeeltelik soos volg: "Dit is 'n hartseer dag vir die Stad van Tshwane en Pretoria om deur 'n man soos Burgemeester Kgosientso Ramokgopa bestuur te word. "Meer as 'n dosyn polisiemotors en Caspers met ‘n horde veiligheidspersoneel het op Dinsdag, 12 April 2016, buite 'n skool in Valhalla saamgedrom met die aankoms van Tshwane uitvoerende burgemeester Kgosientso Ramokgopa. Dit blyk toe die okkasie is dat die burgemeester 'n park in die middel van die woongebied aan ‘n Moslemgroep kom oorhandig het vir die oprigting van ‘n moskee. “Die inwoners van Valhalla is toegang tot die skoolsaal verbied, alhoewel die vergadering deur die Kantoor van die Speaker gereël is en hulle met belastinggeld die gebottelde water verskaf het. Die vergadering is geopen deur uit die Koran te lees en Islamitiese gebede te sing. ‘n Paar inwoners is egter ná aandrang teësinnig tot die saal toegelaat. “Ramokgopa het die vergadering geopen deur die Moslemgemeenskap te prys vir hul bydrae aan die ANC. Hy het ook na sg. Afrikaner-Christelike enklaves verwys en hul gedreig met integrasie met ander gelowe, of hulle daarvan hou of nie. In antwoord op ‘n vraag van ‘n paar inwoners ’Wat van die Christelike geloof?’ het hy hulle as rassisties en onopgevoed bestempel en gesê dat die Moslems ‘n behoefte het om vir hulle te bid. “Ramokgopa het voorts gesê dat indien opponerende inwoners nie die bou van 'n moskee in die gebied goedkeur nie, hulle iewers anders kan gaan woon, ‘n verklaring wat met dawerende applous deur die Moslemgehoor ontvang is. Hierdie situasie is presies wat met Hindoe-inwoners van Laudium en met Christelike inwoners van Erasmia gebeur het toe hulle uit hul huise gedwing is as gevolg van 'n Islamitiese inval en het talle van hulle na Valhalla verhuis. “Ramokgopa het verklaar dat hy gaan toesien dat daar ‘n moskee in elke moontlike woongebied regoor die Stad van Tshwane opgerig gaan word." Meer besonderhede by ds. Theunis Botha van die CDP by 083 657 2482.
In die hofsaak van Solidariteit vs. Tshwane Munisipaliteit het die Arbeidshof in Johannesburg vandeesweek bevind dat die gebruik van ’n kwotastelsel in die werkplek onwettig is. Kragtens die hofuitspraak moet die munisipaliteit mnr. Jan Pretorius, ’n waterouditbeampte, bevorder en terugwerkend vergoed. Regter Faan Coetzee het onder meer bevind dat die munisipaliteit onbuigsaam opgetree het toe hy Pretorius telkens vir bevordering oor die hoof gesien het. Die hof het voorts bevind dat die munisipaliteit se aanstellingsbeleid, waarvolgens daar suiwer op grond van ras en geslag teen mnr. Pretorius gediskrimineer is, op ’n kwotastelsel neerkom wat strydig is met die Wet op Diensbillikheid. Volgens dr. Dirk Hermann, bedryfshoof van Solidariteit, is die uitspraak enig van sy soort aangesien dit die eerste keer is dat die hof bevind het dat daar d.m.v. ʼn kwotastelsel onbillik teen ’n blanke man gediskrimineer is. “Die hof het bevind dat om poste net aan die hand van die nasionale rassedemografie te vul óf selfs vakant te laat ten koste van geskikte wit mans, onwettig is. Die hof het voorts bevind dat die munisipaliteit geen regsgronde gehad het om ʼn toepaslik gekwalifiseerde kandidaat uit die onderhoudproses te laat nie. Boonop het hulle ook nie in ag geneem dat die pos ʼn skaars vaardigheid vereis nie,” sê Hermann.
AfriForum het ’n projek geloods om deur die prosesse van openbare deelname aan die Geïntegreerde Ontwikkelingsplan (GOP) en begrotingsprosesse insette te lewer waardeur munisipale dienste regdeur die land verbeter kan word. Die projek het ten doel om AfriForum-takke te mobiliseer om dienste-, instandhoudings- en ontwikkelingbegrotingsdokumente te ontleed en sinvolle insette in die openbare deelnameprosesse te lewer. Munisipaliteite is dan ingevolge wetgewing verplig om insette te oorweeg en moontlik te implementeer. Die nuutste verslag van Ratings Africa toon dat 60% van munisipaliteite in SA nie finansieel volhoubaar bestuur word nie en dat daar ’n noue verband is tussen swak munisipale bestuur en swak ekonomiese groei, wat beteken dat mense in SA moet opdok vir munisipaliteite wat nie die mas opkom nie. Wat intussen help, is dat die Nasionale Tesourie munisipaliteite tot ’n 6%-tariefverhoging op dienste beperk het en hulle sodoende verplig om 8% van hul begroting op infrastruktuurinstandhouding aan te wend. Sodoende kan onbekostigbare dienstariefverhogings en die verval van infrastruktuur verhoed word. Lede van die publiek kan ook by die projek betrokke raak deur hul dorp se naam na 45344 te SMS (R1 per SMS). Vir meer besonderhede, kontak Marcus Pawson by 072 085 3835 of Hierdie e-posadres word van Spambotte beskerm. Jy moet JavaScript ontsper om dit te lees..
AfriForum het ‘n nasionale veldtog oor die wanbesteding van belastinggeld, Genoeg is Genoeg geloods waartydens strafregtelike klagtes ingevolge artikel 86(1) van die Wet op Openbare Finansiële Bestuur, 1999 teen 13 provinsiale departementshoofde ingedien sal word. Hierdie 13 departemente is geïdentifiseer as die hoofbydraers tot onreëlmatige, vrugtelose, verkwistende en ongemagtigde uitgawes wat altesaam R11,63 miljard van die totale vermorste bedrag van R28,26 miljard vir die 2014/2015-boekjaar beloop. Dit is volgens inligting uit die Ouditeur-generaal (OG) se algemene gekonsolideerde jaarverslag. Die eerste klagtes is reeds teen vier Gautengse departementshoofde by die Johannesburg-Sentraal Polisiestasie ingedien. Dié departemente is onderskeidelik Paaie en Vervoer, Gesondheid, Onderwys en Menslike Nedersettings, waarvan Paaie en Vervoer die grootste sondebok is met ‘n bedrag van R2,19 miljard. Departementshoofde is verplig om volledige rekords van die finansiële sake van hul departemente te hou in ooreenstemming met die voorgeskrewe wetgewing, norme en standaarde. AfriForum moedig die publiek aan om die nodige druk op die Nasionale Vervolgingsgesag te plaas deur ’n SMS met hul naam na 45352 te stuur (R1) of die klagtes op AfriForum se webtuiste by www.afriforum.co.za te onderteken.

Op die internasionale front is die aandag nou sterk gevestig op die Amerikaanse presidentsverkiesing wat einde vanjaar tot finaliteit gevoer word oor wie die septer gaan swaai oor die invloedrykste land ter wêreld vir die volgende vier jaar.

Op hierdie stadium lyk dit of die wedloop tussen die twee groot partye gaan wees tussen Hillary Clinton vir die Demokrate en Donald Trump vir die Republikeine. Die afgelope agt jaar het natuurlik vir Barack Obama van die Demokrate in die saal gesien.

Trump is volgens sy uitsprake ‘n aartskonserwatis en wil met sy flambojante reputasie en reguit siening “Amerika weer groot maak”. Daarenteen speel Clinton op die ou deuntjies van die establishment, terwyl sy as voormalige Amerikaanse minister van buitelandse sake ‘n bedenklike rekord van misstappe in die internasionale politiek het.

Trouens van die beweringe wat oor Clinton gemaak word en wat nogal feitelik naby die waarheid lyk, kan haar strafregtelik vervolgbaar maak. Aan die ander kant, hoewel die prospek van Trump in die Withuis liberale en ook die hoofstroom Afrikaanse media die horries laat kry, kan hy waarskynlik nie ‘n swakker opsie wees as die onbeholpe Bush jr. of die bedrieglike Obama nie.

Die twee grootste Achilleshiele van die VSA op hierdie stadium is, eerstens, dat soveel van sy politici in die sak van die internasionale geldmag is en, tweedens, die land se triljarde dollar skuld – die grootste van ‘n enkele land ooit. Om die VSA uit hierdie twee knellinge te lei, gaan baie spesiale leierskap verg. 

Die omstrede Onteieningswetsontwerp is verlede maand in die Parlement goedgekeur met 202 stemme daarvoor en 88 daarteen, met 2 buite stemming. Die wetsontwerp bepaal o.m. dat die regering enige bate kan onteien as dit in openbare belang geag word, wat beteken selfs aandele, intellektuele eiendom en regte verbonde aan eiendom kan onteien word, desnoods sonder vergoeding indien dit in “openbare belang” sou wees.

                          

Daarmee word ook weggedoen met die beginsel van gewillige-koper-gewillige-verkoper – vir eeue die hoeksteen van eiendomsreg en ‘n vrye ekonomie in SA.

Die wetsontwerp word vervolgens aan die Nasionale Vergadering voorgelê en indien dit daar goedgekeur word, gaan dit na die staatspresident vir ondertekening en inwerkingstelling. Verskeie partye het egter aangedui dat aangesien die wetsontwerp as ongrondwetlik beskou word, die saak na die Grondwethof geneem gaan word.

Die wetsontwerp val saam met voorgestelde landbouwetgewing dat kommersiële boere tot 50% van hul plaasgrond aan hul werkers in ruil vir diens moet oordra en dat eiendomsreg op plaasgrond beperk moet word tot ‘n maksimum van 12 000 ha.

Die Onteieningswetsontwerp moet voorts gesien word in die lig van al hoe meer uitsprake van regeringslede en in die lig van die aandrang van die EFF dat alle grond in SA deur blankes gesteel is en dat dit onverwyld teruggegee moet word aan die “regmatige eienaars” (swartes).

Pres. Zuma weerklank hierdie sentiment herhaaldelik en het op 3 Maart 2016 in ‘n toespraak voor die Huis van Tradisionele Leiers uitgespel dat volgens hom met die Wet op Grond van 1913 het (in Afrikaans vrylik vertaal) “blankes maar net ‘n klein deeltjie van die grond van swartes gevat het. Die oorgrote deel is in die 18de en 19de eeu gesteel met die kolonialisasie van SA. Derhalwe behoort gesteelde grond nie teruggekoop te word en dit met die geld van die mense nie.”

Wie kan argumenteer dat die tafel in SA tans gedek word vir ‘n grootskaalse poging tot grondgryp nie?

Die groot leuen in Suid-Afrika vandag is dat die blanke en in besonder die Afrikaner verantwoordelik is vir die ellende waarin swartmense verkeer. Daar word in die media nasionaal en internasionaal daarop gehamer dat blankes in SA met hul destydse sg. stelsel van “apartheid” mense van kleur verskriklik verontreg het, hul grond gesteel het en dat dit die redes is waarom swartmense nie tot hul reg kon kom nie en daarom steeds “veragter” is.

Voor in die koor sing die staatshoof pres. Jacob Zuma met “Ek vat my masjiengeweer” en saam met die ANC en die EFF moedig hy swartmense aan om hul “gesteelde grond” sonder vergoeding terug te vat om sodoende “ekonomiese vryheid” te verwesenlik. Vir hierdie en ander doelwitte word die skroewe d.m.v. o.a. swart ekonomiese bemagtigingswetgewing en sportkwotas voortdurend skerper aangedraai.

Indien jy iemand as vyand wil skep en en hom wil bykom, dan laat jy hom deur disinformasie brandmerk as die sondebok vir alles wat verkeerd loop. Eva het dit met Adam gedoen, Kain met Abel, Saul met Dawid, die Sanhedrin met Jesus, Hitler met die Jode, ens. Dit is presies wat die ANC / EFF en hul meelopers vandag t.o.v. die blanke in SA doen.

Teenoor hierdie groot leuen staan die ware prentjie – ‘n prentjie wat in die hoofstroom media sover as moontlik onderdruk word, maar wat tog telkens soos ‘n kurkprop na die oppervlakte skiet. Die geskiedkundige feite wat in enige algemene en betroubare literatuur nageslaan kan word, dui opsommend puntsgewys op die volgende:

  • Toe die eerste Europeërs in 1652 aan die suidpunt van Afrika ‘n halfwegstasie kom stig het vir skeepsverkeer tussen Europa en Asië, het die inheemse mense van Afrika nog nie geweet van die wiel nie, het hulle oor geen geskrewe taal beskik nie en het hulle nog geen struktuur meer as ‘n enkelverdieping kon bou nie. Op daardie stadium was dit reeds 1 974 jaar sedert Ptolemy I die manjifieke biblioteek van Alexandria gebou het.
  • Jan van Riebeeck – en voor hom die eerste kruisplanters uit Europa – was verteenwoordigers van ‘n ontwikkelde beskawing wat die Christelike Evangelie gedra het en kon lees, bereken en bou.
  • Gen inheemse Afrikaan in Suider-Afrika is ooit deur Jan van Riebeeck en die Bataafse bewind in slawerny geplaas nie. Slawe is vanaf Madagaskar, Batavia, Ceylon en Oos-Afrika ingevoer. Die eerste  keer dat trekboere vanaf die Kaap die Goeie Hoop met mense met ‘n swart velkleur in aanraking gekom het, was in ongeveer 1770 met die Xhosas in die Amatolavalleie. Slawerny in die Kaapkolonie is op 1 Desember 1834 afgeskaf – twee jaar voor die begin van die Groot Trek.
  • Op daardie stadium het die Voortrekkers geen kennis gedra van die Zoeloe, Tswana, Sotho, Venda, ens. nie. Hulle was wel in oorlog met die Xhosas en dit is hoekom hulle die binneland ingetrek het – in onbewoonde gebied in en waar hulle later swart stamme sou teëkom, het hulle grond geruil vir beeste en geld.
  • Sover dit spesifiek die Zoeloes aangaan, het sodanige volk nie bestaan voor die tyd van Shaka nie. Hy is omstreeks 1787 gebore en het later met besondere krygsvernuf, geweld en moord ‘n aantal klein stamme in die Zoeloevolk verenig, wat dus tot stand gekom het ongeveer 167 jaar ná die aankoms van Jan van Riebeeck in die Kaap. Die interaksie tussen die Voortrekkers en die Zoeloes is geskiedenis wat vir sigself spreek.
  • Nog meer oor die Zoeloes: Shaka het hulle geleer van die lang werpspies en die kort steekspies en van die militêre formasie van die beeshorings waarmee omsingeling en knypbeweging uitgevoer is. Die Zoeloes het dit gebruik om ‘n skrikbewind onder ander swart stamme in suidelike Afrika te voer, bekend as die Mfecane – of die begin daarvan – ‘n moordtog wat uiteindelik tot die uitwissing van tussen 1 en 2 miljoen swartmense gelei het. In die proses is geen kos en klere uitgedeel, geen hospitale gebou en geen behuisingskema aangepak nie.
  • Die Afrikanervolk, oftewel die Boer soos dit mettertyd genoem is, is met hul Nederlandse voorvaders, soos aangevul deur Duitse immigrante, Franse Hugenote en Britse setlaars, ‘n volk wat inheems uit die bodem van Afrika gegroei en ontwikkel het. Hulle was dus nooit koloniste nie.
  • Afrikaans wat as hul taal ontstaan het, het mettertyd met sy grammatika, woordeskat en uitdrukkingsvermoë ontwikkel tot ‘n taal van wêreldgehalte. As sulks staan dit ver uit bokant enige ander inheemse taal op die vasteland van Afrika.
  • In die vorm van die Vrystaatse en Zuid-Afrikaanse Boererepublieke het die Afrikaner die eerste twee suksesvolle onafhanklike state op die vasteland gevestig.
  • As begenadigde draers van die Evangelie, het die Afrikaner die leiding geneem om wet en orde te vestig, mense te versorg, voedsel te produseer, minerale te ontgin en  regeringstrukture te vestig – soveel so dat uiteindelik die eerste en enigste moderne en geïndustrialiseerde staat op hierdie vasteland tot stand gekom het.
  • Die geskiedenis van Suid-Afrika kan nie beoordeel word sonder om die bedenklike rol van imperiale en koloniale Brittanje in berekening te bring nie – vanaf die Republiek van Natalia, tot die diefstal van Kimberley deur die betrokke Keate-uitspraak, die omverwerping van die twee Boererepublieke ter wille van die Witwatersrandse goud, ens.
  • Ná die verpletterende Anglo-Boere-oorlog het die Afrikaner nie bakhand gestaan vir ekonomiese bemagtiging en regstellende aksie nie en ook nie geroof, geplunder en gemoor om kos te kry nie. Nee, die Afrikaner het met geloof en klipharde werk homself aan sy eie skoenrieme opgetrek en ‘n leefwyse en kultuur gevestig vergelykbaar met die beste.
  • Die beleid wat die Afrikaner eintlik op die tafel geplaas het, was afsonderlike ontwikkkeling, wat in skrille kontras is met “apartheid”. Laasgenoemde is negatief, maar deur afsonderlike ontwikkeling soos gepostuleer deur dr. HF Verwoerd, is aan swart volke gegee presies dit wat die Afrikaner vir homself gegun het – eie grondgebied, eie regeringstrukture kompleet met infrastruktuur en Parlementsgeboue en staatkundige onafhanklikheid. Daarvan het die destydse Transkei, Ciskei, Bophuthatswana en Venda getuig. Met die sluipmoord op dr. Verwoerd in 1966 het hierdie beleid tragies ontspoor, maar dat die bal nie deur hierdie swart volke na volle konskwensie gedra is nie, is vir hulle om te verantwoord.

Dit is teen hierdie agtergrond dat uit regdenkende Afrikanergeledere vandag die volgende gesê word:

  • Ons het volle reg om in ons vaderland eersteklas burgers te wees.
  • Ons het by niemand niks gesteel nie, veral nie grond nie en daarom is daar geen onus op ons om enige iets “terug te gee” nie.
  • Ons verdien nie om aan SEB, regstellende aksie, kwotas en enige ander diskriminasie blootgestel te word nie.
  • Ons is trots op ons identiteit en op ons reusebydrae in Suid-Afrika. Ons het foute gemaak, maar watter volk het nie? Daar is nietemin niks in ons verlede wat ‘n albatros om ons nekke regverdig nie.
  • Ons erken die bydrae en rol van die swartmens en die mense van kleur in die opbou van SA die afgelope bykans twee eeue, maar hierdie bydrae en rol moet in perspektief gesien en beoordeel word. Dit moet nie verdraai of vals voorgestel word nie.
  • Ons is nie verantwoordelik vir die gemors waarin SA vanaf 1994 tot huidig “bestuur” is nie.
  • Ons sê swartmense kan nie bevoordeel word deur bloot van blankes te “vat” nie. Swartmense gaan nie bevorder word deur openbare items van andere soos standbeelde en kultuurikone af te breek nie. Die sleutel lê in die skepping van eie ikone wat die toets van die tyd kan deurstaan.
  • Die Afrikaner / Boer is ‘n volk in sy eie reg en ons wil nie onbepaald deur getalstirannie gedomineer word nie. Ons streef derhalwe na volle selfbeskikking.

Dít is die waarheid omtrent die Afrikaner in die Suid-Afrika van vandag.

Die drieledige vraag is:

  • Gaan die Afrikaner self sy regmatige plek in sy vaderland inneem en vir homself onder nuwe omstandighede ‘n nuwe toekoms uitbeitel?
  • Gaan die Afrikaner deur medelandgenote en deur die regering gegun word om ten volle en sonder diskriminasie sy bydrae tot die verdere ontwikkeling van SA te maak?
  • Gaan te midde van huidige stormagtige internasionale gebeure buite SA die mense van hierdie land die geleentheid en tyd hê om sy interne sake binne die raamwerk van wet en orde en die bestaande beskaafde staatsvorm uit te sorteer en aan te beweeg na ‘n stabiele land wat konstruktief bydra tot ‘n beter wêreldorde?
Bladsy 10 van 12

Tridor.jpg

Fabricia proef Maart web 2017.jpg

Die potensiële skadelikheid van die voorgestelde Wetsontwerp op die Regulering van Landbougrondbesit word in 'n... http://fb.me/6u2XvqRsc     https://www.facebook.com/KimPrint-General-Printers-990694727706008/?fref=ts … http://fb.me/38IJKAb0D     Franse Ope: Maria Sharapova nie gekeur nie; Roger Federer onttrek t.w.v. Wimbledon    Paarl Boys High sit Grey Bloemfontein ore aan en bly beste skoolrugbyspan in die land    Naspers betaal R5,6 miljard vir aandeel in Duitse aanlyn kosbestellingsdiens Delivery Hero    Discovery Health in 2016 eiesestyging van 10,4% tot R36,6 miljard, maar premie-inkomste R54 miljard    Die boek The Republic of Gupta – A Story of State Capture gooi meer lig op Guptas in SA en verhouding met Tabo Mbeki    Trump onder skoot van NWO oor vriendelikheid jeens Rusland, met Putin skynbaar ook anti-NWO       DAG 3 @afriforum in hof #GodsdiensInSkole hofsaak @solidariteit @fedsas1 @Jaco_Deacon @SolidariDirk #religioninschoolspic.twitter.com/yfnjwdDAVi    Mei uitgawe van Ditsem Nuus is uiteindelik hier!! Laai die PDF hieronder af, of gaan na ons webwerf... http://fb.me/8BUPW3t9P              Blitsbokke wen Sewes Wêreldkroon 2017!    Ditsem Nuus druk nou 5 000 koerante maandeliks plus aanlynpublikasie    Voorbidding gevra vir saak Christelikheid in skole – Mei 2017 in Suid-Gautengse hooggeregshof    Met oorwinning oor Haaie wys Kings hulle moet in Super-reeks bly    Venezuela in wanorde teen gevolge van “radical economic transformation”    Pro-EU Macron nuwe Franse president; nasionalistiese Le Pen uitgeknikker

ATKV